புழல் சிறை எதிரொலி: கோவை மத்திய சிறையில் திடீர் சோதனை!!

கோவை: புழல் சிறையில், கைதிகள் சொகுசு வாழ்க்கை வாழ்ந்து வந்தது தொடர்பான படங்கள் சமூக வலைத்தளங்களில் வைரலானதைத் தொடர்ந்து, கோவை மத்திய சிறையில் சிறைக்காவலர்கள் திடீர் சோதனையில் ஈடுப்பட்டனர்.

சென்னை புழல் சிறையில் அடைக்கப்பட்டிருந்த பாகிஸ்தான் கைதி ரசூலுதீன், கட்டில் படுக்கை, டிவி, ரேடியோ மற்றும் செல்போன் என சொகுசாக இருக்கும் படங்கள் கடந்த சில தினங்களுக்கு முன் சமூக வலைத்தளங்களில் வெளியாகி அதிர்ச்சியை ஏற்படுத்தின.

இதைத் தொடர்ந்து புழல் சிறையில் நடைபெற்ற சோதனையில், ‘கிளாஸ் ஏ’ பிரிவு சிறையில் உள்ள கைதிகள் டிவிக்கான பிளக் போர்ட்டில், யுஎஸ்பி போர்ட்களை இணைத்து போனுக்கு சார்ஜ் செய்தது கண்டுப்பிடிக்கப்பட்டது. இதையடுத்து, ‘கிளாஸ் ஏ’ பிரிவில் வைக்கப்பட்டிருந்த டிவிக்கள் அனைத்தும் அகற்றப்பட்டன. அதேபோல் பிளக் போர்டுகளும் சிறையிலிருந்து அகற்றப்பட்டுள்ளன.

புழல் சிறையா? லாட்ஜா? – செல்போன், மெத்தை, டிவி என சகல வசதி – சார்ஜ் போடும் வசதி நீக்கம்

பின்னர், இந்த சம்பவத்தில் தொடர்புடைய 5 கைதிகள் வேறு வேறு சிறைகளுக்கு மாற்றப்பட்டனர். அதில், முகமது ரபீக் என்ற கைதி கோவை மத்திய சிறைக்கு மாற்றப்பட்டார்.

இந்நிலையில், கோவை மத்திய மண்டல துணைக் கண்காணிப்பாளர் சுந்தர்ராஜ் தலைமையில், 60 பேர் கொண்ட குழு கோவை மத்திய சிறையில் திடீர் சோதனை மேற்கொண்டனர். சுமார் 3 மணிநேரமாக நடைபெற்ற இந்த சோதனையில், சிகரெட் மற்றும் பீடித் பாக்கெட்கள் மட்டுமே கிடைத்தன.

தமிழகம் முழுவதும் உள்ள சிறைகளில் அதிகாாிகள் அதிரடி சோதனை

முன்னதாக, இதற்கு முன்பு கோவை மத்திய சிறையில் நடைபெற்ற சோதனையில் செல்போன்களும், டிவி செட்களும் கைப்பற்றப்பட்டன என்பது குறிப்பிடத்தக்கது.

Leave a Reply

Your email address will not be published. Required fields are marked *