H Raja: ஹெச்.ராஜா மீது 7 பிரிவுகளில் வழக்குப்பதிவு – tamil

புதுக்கோட்டை திருமயம் காவல் நிலையத்தில் எச்.ராஜா மீது 7 பிரிவுகளின் கீழ் வழக்குப்பதிவு செய்யப்பட்டுள்ளது.

பாஜக தேசியச் செயலாளர் ஹெச்.ராஜா நீதிமன்றத்தை அவமதிக்கும் விதமாக கடுமையான கருத்துக்களைப் பேசுவது போல சமூக வலைத்தளங்களில் பரவும் வீடியோ பல தவிர்க்க முடியாத கேள்விகளை எழுப்பியுள்ளது.

புதுக்கோட்டை மாவட்டம் திருமயம் அருகே உள்ள மெய்யபுரத்தில் விநாயகர் சிலை ஊர்வலம் பாஜக தேசிய செயலாளர் ஹெச்.ராஜா தலைமையில் நடைபெற்றிருக்கிறது. இந்த ஊர்வலம் செல்ல இருந்த பகுதியில் உயர்நீதிமன்றம் தடை விதித்திருப்பதாக அப்பகுதி போலீசார் ஊர்வலத்தைத் தடுத்துள்ளனர்.

ஊர்வலத்தைத் தடுத்த போலீசாரை எதிர்த்து ஹெச்.ராஜா கடுமையான வாக்குவாதம் செய்தார். போலீசார் லஞ்சம் வாங்கிக்கொண்டு செயல்படுவதாக விமர்சித்த அவர் உயர்நீதிமன்றத்தையும் அவமதிக்கும் வகையில் கருத்துக்களைத் தெரிவித்துள்ளார். இந்த சம்பவம் வீடியோவாக சமூக வலைத்தளங்களில் பரவி சர்ச்சைக்கு வித்திட்டது. வாக்குவாதத்திற்குப் பின் நீதிமன்றத்தின் தடையையும் மீறி விநாயகர் சிலை ஊர்வலம் நடைபெற்றதாகவும் தகவல் வெளியாகியுள்ளது.

சமூக வலைத்தளங்களில் பரவும் வீடியோ குறித்து விளக்கம் அளித்துள்ள ஹெச்.ராஜா, “அந்த வீடியோவில் இருப்பது என் குரல் இல்லை. யாரோ என்னை போல பேசி இருக்கிறார்கள். நான் அதை பேசவில்லை” எனத் தெரிவித்துள்ளார். காவல், நீதித்துறைகளை மிரட்டும் தொனியில் நான் பேசவில்லை. நான் பேசியது போல வெளிவந்துள்ள வீடியோ எடிட் செய்யப்பட்டது. யாரோ வீடியோவை எடிட் செய்து வெளியிட்டுள்ளார்கள். எனக்கு எதிராக செயல்படும் சிலர் திட்டமிட்டு செய்த செயல் இது எனவும் கூறியிருக்கிறார்.

இந்நிலையில், புதுக்கோட்டை திருமயம் காவல் நிலையத்தில் எச்.ராஜா மீது போலீசாரை அவதூறாக பேசியது, உயர் நீதிமன்ற உத்தரவை மீறியது உள்ளிட்ட 7 பிரிவுகளின் கீழ் வழக்குப்பதிவு செய்யப்பட்டுள்ளது.

Be the first to comment

Leave a Reply

Your email address will not be published.


*