கருக்கலைப்பில் உயிரிழந்த பெண்ணின் வயிற்றில் ஆண் குழந்தை: உடற்கூறு ஆய்வில் தகவல்!

மதுரை மாவட்டத்தில் பெண் குழந்தை என்று தெரிந்து 7 மாத கருவை கலைத்த பெண்ணின் வயிற்றில் ஆண் குழந்தை இருந்துள்ளது உடற்கூறு ஆய்வில் தெரியவந்துள்ளது.

மதுரை மாவட்டம் உசிலம்பட்டி அருகிலுள்ள உத்தப்புரத்தைச் சேர்ந்தவர் ராமர். இவரது மனைவி ராமுத்தாய். இவர்களுக்கு ஏற்கனவே 3 பெண் குழந்தைகள் இருக்கும் நிலையில் 4வது முறையாக ராமுத்தாய் கருத்தரித்திருந்தார். இந்தக் குழந்தையாவது ஆண் குழந்தையாக இருக்கும் என்ற ஆசையில் இருந்த ராமுத்தாய்க்கு அதிர்ச்சி காத்திருந்தது.

4வதும் பெண் குழந்தை என்று தெரியவர, 7 மாத கர்ப்பிணியாக இருந்த ராமுத்தாய் மருத்துவர்களிடம் சென்று ஆலோசனை கேட்டுள்ளார். 7 மாதம் ஆன நிலையில், இனி ஒன்றும் செய்ய முடியாது. குழந்தை பெற்றுக்கொள்வதே சிறந்த வழி என்று மருத்துவர்கள் அறிவுரை வழங்கியுள்ளனர். இதையடுத்து, அதே மருத்துவமனையில், பணியாற்றி வந்த செவிலியர் ஜோதிலட்சுமியை அணுகியுள்ளார்.

இப்படியும் ஒரு பெண் இருப்பாளா? 4வதும் பெண் என்று 7 மாத கருவை கலைத்த பெண் பலி!

கருவை கலைக்க தான் உதவுவதாக கூறிய ஜோதிலட்சுமி, இதற்கு ரூ.20 ஆயிரம் வரை செலவாகும் என்று தெரிவித்துள்ளார். இதையடுத்து, ஜோதி லட்சுமி கேட்டதை கொடுத்த ராமுத்தாய், தொட்டப்பநாயக்கனூரில் உள்ள ஜோதி லட்சுமி வீட்டிற்கு சென்று சிகிச்சை பெற்றுள்ளார். அப்போது, ராமுத்தாய்க்கு திடீரென்று மூச்சுத்திணறல் ஏற்பட பரிதாபமாக உயிரிழந்துள்ளார்.

இதையடுத்து, ஜோதிலட்சுமியை கைது செய்த போலீசார் அவரிடம் விசாரணை மேற்கொண்டனர். அப்போது, பணத்திற்காக ஆசைப்பட்டு இவ்வாறு செய்துள்ளதாக ஒப்புக்கொண்டுள்ளார். இதன் காரணமாக மருத்துவர் அல்லாத ஒருவர் கருக்கலைப்பு செய்த குற்றத்திற்காக இந்திய தண்டனைச் சட்டம் 314, கருக்கலைப்பு தடைச்சட்டத்தின் 5வது பிரிவு உள்ளிட்ட 4 பிரிவுகளின் கீழ் செவிலியர் ஜோதிலட்சுமி மீது வழக்குப் பதிவு செய்யப்பட்டுள்ளது.

இதையடுத்து, உயிரிழந்த ராமுத்தாயின் உடலைக் கைப்பற்றி மதுரை அரசு ராஜாஜி மருத்துமனைக்கு உடற்கூறு ஆய்விற்காக கொண்டு செல்லப்பட்டது. அங்கு மேற்கொண்ட ஆய்வின் போது ராமுத்தாயின் வயிற்றில் இருந்தது ஆண் குழந்தை என்று தெரியவந்துள்ளது என்பது குறிப்பிடத்தக்கது.

Leave a Reply

Your email address will not be published. Required fields are marked *